PABORHATHON PURNABAKTI PDT. J.H.MULLER TAMBA & PANGOJAKHONON PDT. DOTUR PURBA SONGON PENDETA HKBP RESSORT MEDAN TIMUR NA IMBARU

Di ari Minggu Reformasi (XXII Dung Trinitatis), 27 Oktober 2013 na salpu dipatupa hurianta HKBP Ressort Medan Timur do acara Paborhathon Purnabakti di amanta Pdt. Jiman H. Muller Tamba naung mangula 46 taon 7 bulan lelengna songon parhobas di tongatonga ni HKBP. Laos di ari minggu i do dipatupa acara pangojakhonon ni Pdt. Dotur Purba songon uluan ni ressort naimbaru di HKBP Ressort Medan Timur. Nasida pinda tugas sian HKBP Ressort Pekan Baru, songon pandita ressort. Na manguluhon acara i, ima Pdt. Marolop P. Sinaga, M.Th. (Kepala Departemen Marturia HKBP).

Kepala Departemen Marturia paborhathon Pdt. J.H.M. Tamba mamongoti masa purnabakti

Pangojakhonon Pdt. Dotur Purba gabe Pandita HKBP Ressort Medan Timur naimbaru

 Andorang so parmingguon dipatupa do acara serah terima jabatan di bilut parhobasan, nidohotan anggota MPSD (Majelis Pekerja Sinode Distrik) Medan-Aceh, parhalado ressort, parhalado sabungan (HKBP Sidorame) dohot parhalado na sian pagaran (HKBP Gangsado, GKJ Sei Rotan,  HKBP Bandar Setia). Mardalan acara serah terima di bagasan keakraban dohot parhahamaranggion.

Penandatanganan berita serah terima jabatan pendeta HKBP Ressort Medan Timur dipimpin oleh Pdt. Marolop P. Sinaga, M.Th.

Di acara kebaktian Minggu, denggan do mardalan parmingguon niuluhon Pdt. Martin Manullang, S.Th.(anggota MPSD X Medan Aceh) songon liturgis, dohot Pdt. Marolop P. Sinaga, M.Th. songon parjamita na mamboan barita nauli. Di tingki na marjamita, dipatorang do teks Mateus 20:20-28 na mamboan topik Minggu: “Manang Ise Na Naeng Sangap, I Ma Gabe Pangoloi Di Donganna”. Sai adong do tubu di roha ni jolma asa gabe sangap. Laos i do pangidoan ni ina ni anak ni si Sebedeus tu Jesus, naeng nian dipaloas ianakhonna hundul di siamun nang ni hambirang ni Jesus. Hundul do dipangido. Hape pola pikir na sisongoni do na ringkot di-REFORMASI. Ndang hundul gabe dalan tu hasangapon alai marhobas. Ndang ingkon jolo mar-jabatan (memiliki jabatan) baru pe targoar sangap. Ai godang halak na hundul di jabatan na timbo, hape so jolo sidung dope masa jabatanna, nunga masuk penjara. Laos ditogihon parjamita do na mandohoti parmingguan asa serep marroha songon sada dalan pangoloi di Debata dohot di dongan.

Di na mandok hata partadingan amanta Pdt. Jiman H.M. Tamba, dirajumi nasida do balga ni pambahenan ni Debata saleleng marhobas di tongatonga ni HKBP. Tung marragam do angka tantangan naung niadopan alai marujung do saluhutna mangkorhon na denggan tu ulaon panghobasion. Dung i mandok mauliate do nasida tu ganup parhalado nang ruas ni HKBP sa-ressort Medan Timur (HKBP Sidorame, HKBP Gangsado, GKJ Sei Rotan dohot HKBP Bandar Setia) di parsaoran na denggan dohot acara paborhathon purnabakti sadari i.

Dung diojakhon, amanta Pdt. Dotur Purba manogihon saluhut ruas nang parhalado asa saling mendukung di na pahembanghon ngolu parhuriaon di HKBP Ressort Medan Timur. Digombarhon nasida do huria i songon sada sepeda na adong lobi sian 2 hundulanna marganjang tu pudi. Godang manang lobi sian sahalak na ingkon rap mang-gohet asa boi laju mardalan sepeda i. Alai tong do ingkon sada paniop stang (kemudi). Boi do na di pudi mangalehon aba-aba mandok tu hambirang, tu siamun manang mangelakhon lubang, alai sipaniop stang tong do ingkon sahalak. Songon i do kerjasama na niigil Pdt. Dotur Purba di na laho mandalani panghobasion di tongatonga ni HKBP Ressort Medan Timur. Asa sude parhalado nang ruas mangalehon roha, gogo, nang pingkiran di na laho pahembanghon ngolu ni huria huhut marsiurupan alai na manguluhon hot ma dihaposi naung niojakhon sadari i.

Di acara bimbingan dohot arahan, Pdt. Marolop P. Sinaga, M.Th. (Kepala Departemen Marturia HKBP) paboahon, sada las ni roha do di sahalak pandita molo boi nibolus acara paborhathon purnabakti na di ibana. Jala molo dipatupa acara paborhathon purnabakti, jabatanna i do na purnabakti, alai hot do anggo tohonan dohot hataridaanna. Nang di HKBP Ressort Medan Timur pe, sada kebanggaan di sada huria/resort do i boi paborhathon purnabakti sahalak parhalado fulltimer. Anggiat lam manumpak Debata di ruas nang parhalado di ganup ulaonnasida marsadasada. Adong pigapiga kampus jongjong di humaliang HKBP Ressort Medan Timur, asa nunga ingkon dilehon roha ni huria laho menjangkau (outreach) mahasiswa di ulaon panghobasion. Laos i ma tanggungjawab na balga siparohahonon ni uluan ni resort naung diojakhon.

Pdt. Marolop P. Sinaga, M.Th. (Kepala Departemen Marturia) saat memberikan arahan dan bimbingan

Selamat memasuki masa pension, dan selamat berkarya!

(Cal. Pdt. Hendra Gunawan Simatupang)

Sumber : http://hkbp.or.id/paborhathon-purnabakti-pdt-j-h-muller-tamba-pangojakhonon-pdt-dotur-purba-songon-pendeta-hkbp-ressort-medan-timur-na-imbaru/