JUBILEUM 50 TAHUN HKBP SIHOBUK & MBO BAGAS NI PARHALADO FULLTIMER

 

Rasirasa sadarion diurupi Jahowa do hita (1 Sam. 7:12). I ma panindangion ni ruas nang parhalado HKBP Sihobuk di pandonganion ni Debata di pardalanan ngolu ni huria i. Laos i do na digurithon gabe thema pesta Jubileum 50 Tahun na dipatupa di ari Minggu, 20 Oktober 2013. Mardonganhon Subthema, asa gabe pasupasu hita di portibion jala mambaritahon dengganbasa ni Debata tu na humaliang dohot tu pomparanta asa mananda Jesus Sipalua i. (trnslt).

Gambaran Singkat HKBP Sihobuk

Huria pagaran do ia HKBP Sihobuk na marressort tu HKBP Ressort Laguboti. Nuaeng dihobasi sahalak parhalado fulltimer calon partohonan ima Cal. Biv. Riris Panjaitan. Ia Pandita HKBP Ressort Laguboti ima Pdt. Herry Simanungkalit, S.Th. Anggo jarak sian pagaran tu sabungan hirahira 5 km jala boi nijangkau 15 menit pardalanan dohot kendaraan bermotor. Adong 40 ama, 50 ina, 26 remaja/naposobulung dohot 48 singkola minggu ruas sihobasan parhalado. Jala godangan do ruas mangula songon partani.

Sejarah Singkat Jubilaris

Masa do PRRI (Pemberontakan Revolusioner Republik Indonesia) najolo na dikomandani Kolonel M. Simbolon. Sai masa parporangan di Bonandolok hatiha i, i ma ala ro pasukan sian Jawa laho menumpas PRRI, ai dipangke Kolonel Simbolon do Bonandolok songon sada markas nasida.

Di hatiha i, sai tu Bonandolok do marminggu halak Kristen na di luat Sihobuk. Marningot dao ni pardalanan lao manopot gareja jala situasi na so tontu (hurang kondusif), marsada roha ma ruas na di luat Sihobuk laho pajongjonghon bagasjoro ni Debata. Marrapot ma nasida jala adong dos ni tahi hatiha i asa sude manaba hau na be, pangkeon laho pajongjong gareja. Op. Boi Siagian (+) ma di hatiha i na mangalehon tano pangkeon ni gareja jala Pdt. Titus Simanjuntak na mangaresmihon HKBP Sihobuk gabe huria na gok. Uluan ni huria na parjolo ima St. Jahia Siagian. Di taon 1983, disangkapi ruas nang parhalado laho patupahon pembangunan gareja. Ro do Sekretaris Jenderal HKBP hatiha i, Pdt. PM. Sihombing laho mameakhon batu ojahan (MBO). Berkesan do haroro ni amang Sekjen di roha ni ruas, ai dilelang do dasi na tongon pinangke ni amang Sekjen tu pembangunan gareja, marasam Rp 12 juta di hatiha i.

Mameakhon Batu Ojahan

Andorang so masuk tu parmingguon, dipatupa do acara Mameakhon Batu Ojahan bagas parhalado fulltimerHKBP Sihobuk. Acara niuluhon Pdt. Herry Simanungkalit (Pendeta HKBP Ressort Laguboti). Dung marende dohot tangiang pamuhai, dilehon do tingki parjolo sahali tu amang Pdt. Marolop P. Sinaga, M.Th. (Kadep Marturia HKBP) mameakhon batu ojahan. Dung i pe dipasahat tu Pdt. Robert Silaban (Praeses HKBP Distrik IV Toba). Dohot do perwakilan sian pemerintah setempat dohot perwakilan ruas nang perwakilan pangaranto laho mameakhon batu ojahan. Dung i, amang Pdt. Marolop P. Sinaga, M.Th (Kadep Marturia HKBP) ma na mambahen tangiang panutup.

Acara Parmingguon

Mardalan do acara parmingguon dohot denggan niuluhon amang Pdt. Robert Silaban songon liturgis dohot Pdt. Marolop P. Sinaga, M.Th. songon parjamita na mamboan barita nauli. Tung torop do punguan koor na parsidohot patubegehon ende pujipujian laho manghalashon acara Jubileum i, ai dohot do nang huria sian ressort tetangga mandohoti ulaon i. Angka punguan i, i ma:

  1. Koor HKBP Silaen
  2. Koor HKBP Laguboti Godung
  3. Koor Ama Pos Parmingguon    Ressort Laguboti
  4. Koor Ina Dolok Hermon
  5. Koor Ama HKBP Hutahaean
  6. Koor Ama HKBP Immanuel Sitoluama
  7. Koor Ina HKBP Haunatas
  8. Koor Ina HKBP Simaremare Jae
  9. Koor Ina sian ruas parserahan ni HKBP Sihobuk
  10. Koor Ina HKBP Paronan Nagodang
  11. Koor Mahasiswi Singkola Bibelvrouw

Di tingki na marjamita, dipatorang parjamita do (Pdt. Marolop P. Sinaga, M.Th.) teks Markus 12:28-34 na marhadomuan tu holong. Andorang so ro hakristenon, adong do patik (uhum) na marlangku di tongatonga ni halak Batak. Jala sai adong do patik manang uhum na nipatikhon di ganup suku/bangso ima laho mangaturhon parngoluan di tongatonga ni bangso i. Alai dung sahat barita nauli jala ditanda Padan Na Robi, ditanda halak Batak ma patik na so holan mangatur parsaoran dohot dongan jolma alai dohot do parsaoran tu Debata marhite holong.

Marhite Sibotosurat dohot Sibotopatik, dungkon ni i di Padan Na Robi, gabe dipahebaheba ma Patik ni si Musa. Ndang be holan sampulu alai gabe lobi sian 600 patik dohot hatoranganna. Lamu so diantusi halak Jahudi hatiha i angka aha patik i sasintongna, holan Sibotosurat dohot Sibotopatik na ma na umbotosa. I do alasan nasida manungkun tu Jesus aha do patik na ummangat sian i, ala yakin nasida ndatung diboto Jesus nasa i godangna. Laos ima dalannasida laho menjebak Jesus.

Sederhana do alus ni Jesus jala mura antusan, holong i do patik raya. Laos ditogihon parjamita do ganup na mandohoti parmingguon maniru cara ni Jesus laho mempraktekkan holong. Mamungka sian na sederhana jala na mura antusan laho manghaholongi Debata nang dongan jolma. Asa laos marhite pesta Jubileum, nihirim do lam marbungaran holong di luat i tu tingki na mangihut, asa tamba denggan ngolu haporseaon nang ngolu siganup ari di tongatonga ni huria.

Dohot do Pdt. B.M. Siagian, S.Th.(Bendahara Umum HKBP), Pdt. Ebsan Hutabarat, Pdt. Juniar Siregar, Pdt. Reni Tiar Purba, Pdt. James Nainggolan, Pdt. Parasian Simamora, Pdt. Krisostomus Doloksaribu, Pdt. Fajar Lubis, di na manutup acara parmingguon Pesta Jubileum i.

Selamat mar-Jubileum ma di HKBP Sihobuk !

(Cln. Pdt. Hendra Gunawan Simatupang)

Sumber : http://hkbp.or.id/jubileum-50-tahun-hkbp-sihobuk-mbo-bagas-ni-parhalado-fulltimer/

0 replies

Leave a Reply

Want to join the discussion?
Feel free to contribute!

Leave a Reply

Your email address will not be published. Required fields are marked *